Dram
familiyal isi.
Po slané la na in takon domoun i tiyé azot antr zot. Larénion
po so lané 2009, na in takon dram, sirtou familyal lé inpardonabl
sirtou kan na zanfan lé anndan. A so lépok ousa nou viv tousa
i devré pa ékzisté. Dé pli anplis i va bann koupl
i tiyé azot antrozot, é tout la famiy i pas.
Dann tan lontan navé dispit, té violan, mé pa konm azordi,
pli i avans tout i sava an sarèt saviré. Po sèrtin bann
psikolog ou sinonsa bann mèdsin i di ké sé in kètiyon,
lédikasyon bann marmay, kan lé ti sèrtin marmay, zot
paran i di azot zamé non, é sé kan i deviyn adilt, banna
i aksèpt pa lo rofi, sé posa dapré zot na in tankon
dram depli an plis.
Na sèrtinn man la vérité ladan, mé sak i spas
dann la tèt in moun lé dir po kontrolé, lo moun li minm,
lé inprévizibl. Nou sava pa mèt sa si lo kont lo déstin,
sak i fo dir osi ké nou na in sèrtin lédikasyon na kaziman
pli d-valèr. Pli de respé po pèrsonn, in lévolisyon
lavi lé bazé si nafèr san valèr.
An longèr zourné, bann marmay lé dovan bann zé violan,
lé paran i asté la plipar lotan san kontrolé.
Latélé i basine anou sanm, bann film violan, finm kaziman érotik
( fé-lamour, top modèl, po sit sa ) bann fèyton an losikré bann
domoun lé domi touni anndan, i anbras a sak instan, losikré ladilafé,
dispit divors , sakinn i pas sanm inn alot.
Sa sé pa la vi, mé si nou rogard sèrtin film, é nou
rogard la violans anndan, sé èkzaktoman tout sat i dann lavi
azordi. aparaman sèrtin i kwra tourn film.
Siyantifikman lé prouvé si toulézour ou lé konfronté sanm
la violan, ou si ou lé éspozé dann in mové lanvironman,
out léspri i adapt ali. Tout lé fé po plis ki sava nou
deviyn violan bann marmay zordi i grandi ladan, sanm bann zé ousa
na touzour la violans andan, bann film i batay solman, lé bann zéfé spésyo
lé fé po intrigé fé rant dann la tèt.
A biyn rogardé partou dann lomonn na la violans, koman fé po arèt
tousa? La fo pa révé malgré, tout zafèr banna wa mèt anplas sra difisil,
sanz in mantalité déza anfonsé biyn o fon. La pa rink
bann gramoun i fé la violans, koméla la plipar bann ti zinn i lèv lé formé
po èt violan, de par zot manièyr viv é lévolisyon Larényon.
Na tro lwa la été fé po protézé, mé an fèt la ansèrvi po po asèv fout la
pagay, pétèt osi mal ansèrvi la fo war. La zénérasyon
i lèv nou wa bann marmay minèr de pli anpli tar dann somin la nwin, zinn
marmay sanm sigarèt lakol zamal apinn 12 - 13, kisa i donn larzan
po asté
si i sava pa volé ou sinon kas loto domoun?
....
