SIDA : In lékip bann sèrsèr amérikin la dékouv na pwin
lontan dé nouvo zantikor i pouré débous si la fabrikasyon in vaksin kont
lo viris sida dapré bann tavo
ké la été fé é pibliyé lo 3 séptanm 2009.
Dapré s-ki-di , banna wa ésèy ésplwat, bann fay na si lo VIH (virus
de l'immunodéficience
humaine ), po sèy war
si na in posibilité giny fé in vaksin. Zo i èpèr kal lo linféksyon
i totos pli de 25 milyon lomor dopi zané 1985. So bann zantikor ké banna i
apèl "bNAbs" na bonpé kapasité po arèt é kapay lo VIH.
La manyèr so bann zantikor la laté dékouvèr, wa ankor montré bann fay si lo
viris la dapré lo bann sèrsèr.
Zot bann travay laté dann
magazine Sience in média koté Zétazini lo 4 séptanm. So
dékouvèrt i fé in gran louvèrtir si in probal vaksin kont so maladi la, vik
zot na bann nouvo zéléman po travay desi, sé in nafèr inportan dapré Wayne
Koff, dirètèr la rosèrs èk dévlopman de IAVI, initaitiv mondyal po in vaksin
kont sida.
Inn ti rapèl azot, ké kan maladi la la konmansé, bonpé
domoun la fé la rosèr ladsi, san awar trouv lo bout,à lépok na
bonpé tèst laté fé dési bann kobay domoun, san trou bann solisyon. Na bonpé
nafèr té di té soupsoné si bann laboratwar de resèrs, si lo fé ké zot té fine
probableman trov lo vaksin, é zot la kasyèt.
Napwin trolontan bann santr de
rosèrs la komans larg lokor pars i raport pa zot asé larzan. Zordizour na in
probabl vaksin èské banna wa rokomansé po rodomann larzan?
Arla in nafèr lé inportan é i viyn ankor si koté lamérik, a krwa an Erop banna
i bouz pa tro, antouléka sé in dékouvèrt lé inportan, é konm nou koné wa anprofité
a bann péi ris, konm lo tritérapi é dot trèman.
Konm zot i koné dann so sosiyété
kapitalis, i préfèr géri sak nana larzan. Dann so milénèr
ousa noulé dann lotan, na ankor dot maladi à dékouvèr, é dot i sava ankor totos
anou, sé konm in listwar san fin, kan la fini sanm inn lot i komans.
